ازاي أعلم طفلي قيمة النقود؟
أزاي يعرف ان بابا وماما بيتعبوا علشان يوفروا ليً كل اللي نفسي فيه؟
ازاي مايبقاش أناني .. أو بخيل .. أو طماع ؟
ازاي اعلمه الادخار، واستثمار مدخراته بطريقة نافعة وإيجابية؟
دي كلها أسئلة بيسألها الآباء والأمهات ومحتاجين إجابات عليها .
خلينا نقول الأول ان النقود شيء أساسي في الحياة وفي التعاملات اليومية .. لكن أهم حاجة لازم نركز عليها من أول لحظة واحنا بنعلم أولادنا قيمة النقود اننا نفهمهم انها “وسيلة” مش “غاية” .. هي وسيلة نحصل من خلالها على اللي بنتمناه .. وسيلة تخلي حياتنا أسهل وأفضل .. لكن مش “هدف” في حد ذاتها وإلا الطفل هيكبر ويتعلم ان اهم حاجة في الدنيا هي “الفلوس” ومش مهم هيجيبها منين أو ازاي. ولأن يهمنا نعلم اولادنا قيم زي ما بنكسبهم مهارات، يبقى لازم يفهموا الجزء ده كويس اوي طول فترة تدريبهم على أهمية النقود وأهميتها ونشرحلهم من خلال قصص بسيطة ازاي بدأ استخدام النقود، ومراحل تطورها، وانه تم اختراعها لتسهيل التعاملات بين البشر.
– من أول ما يبدأ طفلك يتعلم العد يبدأ كمان يتعلم أهمية وقيمة النقود .. قبل كده هي بالنسبالة شوية ورق ملون.. مايقدرش يفرق بين العملة الكبيرة من الصغيرة.. يبقى أول حاجة نعلم أولادنا يعدوا .. يجمعوا ويطرحوا أرقام صغيرة وبسيطة .. وممكن نعمل ده من خلال الألعاب اللي بتنزل على الكمبيوتر والموبايلات حتى قبل ما الطفل يدخل المدرسة.
– استخدم “اللعب التخيلي” كوسيلة لتعليم طفلك قيمة النقود .. زي انه يعمل نفسه تاجر وبيبيع لك سلعة .. وتبدأ تسأله دي بكام؟ ولو أخدت منها “عدد” يبقى كله كام؟ .. وتتبادلوا الأدوار بحيث يبقى هو المشتري وينفذ نفس الخطوات فيبدأ يتعلم مبادئ عن التعامل بالنقود والعملات المحلية.
– ابتدي علم طفلك يدخر (يحوش) مبالغ بسيطة في فترات زمنية بسيطة وحسسه انها لعبة بتلعبوها مع بعض.. يعني تتفق معاه انه يحوش من مصروفه لمدة أسبوع مبلغ معين، وان في آخر الأسبوع هتفتحوا الحصالة وتشوفوا فيها كام ولو قدر يحوش المبلغ ده انت هتكمل عليه وتجيبله حاجة بيحبها (لعبة / كتاب / فسحة) وبكده يبقى جواه دافع حقيقي للأدخار ويبقى عارف انه مش هدف في حد ذاته لكنه هيحقق من خلاله هدف أهم بالنسباله.
– أفتح لطفلك حساب توفير في بنك وخليه يتابع بنفسه نمو مدخراته بالتدريج .. وابدأ خطط معه وساعده في وضع خطط لإنفاق هذه المدخرات في أشياء نافعة .. يعني لما يطلب منك حاجة مثلاً تقوله “خلينا نشوف معاك كام دلوقتي .. والحاجة اللي هتجيبها محتاجه كام .. يبقى باقي كام .. طيب تفتكر محتاج وقت قد ايه علشان تدخر باقي المبلغ .. ومفيش مشكلة خالص لما تحس انه بيبذل مجهود انك تساعده بقرض صغير أو منحة لا تُرد
– في النقطة اللي قبل كده ذكرت انك ممكن تساعد الطفل بقرض صغير أو منحة لا ترد .. أيوه ده حقيقي مهم جداً انك لما تُقرض طفلك “تسلفه” يبقى فاهم ان ده “سلف” يعني “دين” ولازم يرده .. مهما طال الوقت اوعى تنسى أو تتنازل.. لازم يبقى فاهم انه مادام وعد برد المبلغ لازم يرده حتى لو هيدفعه على أقساط .. ويبقى فاهم الفرق بين انك تمنحه النقود اللي محتاجها وبين انك تسلفه
– لما تنزلوا مع بعض السوبرماركت أو المول علشان تشتروا طلبات البيت أو اللبس أو اللعب، مهم جداً انك تحدد للطفل المبلغ اللي مسموح له انه يُنفقه خلال اليوم .. مهما كان صغير أو كبير لازم مايتعداش الرقم بأي حال من الأحوال ومهما كان الفرق بسيط لأن ده هيعلمه ازاي يظبط احتياجاته وفقاً لإمكانياته ، وهيعلمه كمان حاجة مهمة أوي وهى “ارجاء الإشباع” أو ما يُسمى بـ “تأجيل الإشباع” ، يعني لما يبقى عايز كذا حاجة وامكانياته ماتسمحش يبتدي يختار أهم الحاجات دي ويأجل الباقيين لوقت تاني .. وده هيخليه لما يكبر يصمد امام احباطات الحياة المتكررة ويبقى فاهم ان مش كل حاجة بنتمناها بنحصل عليها
– مهم جداً انك تستجيب لطلبات الطفل بنسبة لا تتعدى الـ80% .. مش كل حاجة يطلبها أو “يشبط” فيها لازم تجيله .. يعني قصاد كل 10 حاجات يطلبهم تعتذر عن حاجتين على الأقل .. حتى لو تقدر تجيبهم .. انت كده مش بتحرمه ولكن بتعلمه يحترم امكانياتك ويفهم انك احياناً مش هتقدر توفر كل المتطلبات وانه لازم ينتظر أو يعمل “تأجيل الاشباع” زي ما قولنا قبل كده بدون ما يغضب أو ينفعل وشوية بشوية هيبتدي يتعلم ده
– حاول بقدر الإمكان وانت بتتسوق مع طفلك اللي لسه بيبدأ يتعلم قيمة النقود انك تستخدم النقود السائلة مش “الكريدت كارد” لأن استخدام بطاقات الائتمان بيخلي الشخص مش عارف صرف كام وباقي كام وبتسهل جداً حركة البيع والشراء فهتخلي الطفل يحس ان الموضوع سهل وبسيط ومن خلال قطعة بلاستيك ممكن اجيب كل اللي نفسي فيه .. ولاحقاً لما يكبر ده ممكن يخليه مايقدرش يضبط نفقاته وتتعدى حدود امكانياته.
– مهم جداً وانت بتعلم طفلك قيمة النقود تعلمه كمان الطفل قيمة العطاء، يعني لو اشترى لعبة جديدة يبقى يختار لعبة حلوة من لعبه الموجودة ويتنازل عنها بحب ورضا لطفل تاني محتاجها، ونفس الشئ مع الملابس.. وتعلمه يُعطي المحتاج من أفضل ما عنده مش من القديم او المكسر .. قول لطفلك “زي ما انت هتفرح خلي غيرك يفرح كمان” .. وخده معاك وأنت بتتبرع لأي جهة خيرية وعرفه ان ده حقهم .. كل الأنشطة دي هتعلمه التكافل الإجتماعي والتعاطف والعطاء غير المشروط.
– من المهم انك تساعد طفلك يشارك بصورة بسيطة في النفقات من وقت للتاني .. زي انه يشارك في هدية عيد ميلاد فرد من أفراد الأسرة، أو شراء هدايا لأصدقاءه، أو حتى أدوات التزيين والمُلصقات والحلوى اللازمة للحفل بما يتناسب مع امكانياته البسيطة ودون أن تفرض عليه ذلك بل يجب ان يكون بمحض ارادته وسط أجواء مليئة بالمرح والسعادة ..
مع تمنياتي للجميع بحياة سعيدة وإيجابية
لمتابعة كل المقالات والأخبار والفعاليات اشترك في نشرتنا البريدية الآن
